SCAAK

SCAAK Portal është aplikacioni zyrtar digjital i Shoqatës së Kontabilistëve të Çertifikuar dhe Auditorëve të Kosovës, i krijuar për t’u ofruar studentëve, anëtarëve dhe kandidatëve qasje më të lehtë dhe më të shpejtë në shërbimet e SCAAK. Përmes aplikacionit, përdoruesit mund të regjistrohen, të identifikohen në llogarinë e tyre, të menaxhojnë profilin personal, të aplikojnë për provime, të ndjekin informacione të rëndësishme lidhur me statusin e tyre, si dhe të kenë qasje në shërbime të tjera të portalit. Aplikacioni synon të lehtësojë komunikimin dhe ndërveprimin ndërmjet SCAAK dhe përdoruesve të saj, duke ofruar një mënyrë moderne, të sigurt dhe praktike për menaxhimin e proceseve administrative dhe profesionale. SCAAK Portal është pjesë e transformimit digjital të SCAAK dhe mbështet studentët, anëtarët dhe profesionistët në zhvillimin e tyre profesional. SCAAK është organizatë jo-qeveritare dhe jo-fitimprurëse, e themeluar në vitin 2001 me qëllim të zbatimit dhe promovimit të standardeve globale dhe praktikave më të mira për profesionin e ri dhe asistimit në zhvillimin ekonomik në të mirë të interesit publik. Historia jonë filloi me një ide, e cila u bë një institucion që iu shërben nevojave të ekonomisë dhe që ka funksionuar për ta orientuar vendin tonë drejt një ekonomie të re e që përmbush rolin e një organizate profesionale moderne të kontabilitetit. Në këtë mënyrë, SCAAK u bë organizata e parë profesionale që ofron programe të edukimit për kontabilitet dhe auditim dhe shoqata e parë që u licencua nga Këshilli Kosovar për Raportim Financiar (KKRF), që është autoriteti rregullativ i standardeve të raportimit financiar, kontabilitetit dhe auditimit. Sot, SCAAK është një organizatë që ofron programe të edukimit të standardeve të larta dhe i përfaqëson rreth tetë mijë profesionistë, të cilët janë të angazhuar në sektorë të ndryshëm, në institucione kyçe të Republikës së Kosovës, siç janë Zyra e Kryeministrit, Ministritë, Banka Qendrore, Zyra Kombëtare e Auditimit, Dogana e Kosovës, Administrata Tatimore e Kosovës, Komunat si dhe bizneset dhe firmat e auditimit. Përputhja me rregulloret për profesionin por njëkohësisht edhe me standardet vendore dhe ato ndërkombëtare të edukimit dhe trajnimit të zhvilluara nga Bordi për Standardet Ndërkombëtare të Edukimit në Kontabilitet (BSNEK), kanë bërë që SCAAK të merret si model për zhvillimin e organizatave profesionale në vendet në zhvillim. Përkushtimi i anëtarëve dhe strukturave qeverisëse të saj për zbatimin rigoroz të standardeve, bënë që në vitin 2009, SCAAK të bëhet anëtare me të drejta të plota në Federatën Ndërkombëtarë të Kontabilitetit (FNK/IFAC) duke u bërë kështu organizata e parë profesionale kosovare dhe njëra ndër të paktat në Ballkan që u anëtarësua në FNK, që është një organizatë profesionale globale e kontabilitetit dhe auditimit që i përfaqëson më shumë se 175 organizata anëtare në 130 vende anembanë botës dhe mbështetë zhvillimin dhe zbatimin e standardeve të kontabilitetit, auditimit dhe të edukimit si dhe bën mbikëqyrjen e zbatimit të këtyre standardeve nga organizatat anëtare. SCAAK është anëtare me të drejta të plota edhe e Federatës Evropiane të Kontabilistëve dhe Auditorëve për NVM (EFAA) dhe Federatës Mesdhetare e Kontabilistëve (FCM). Si rezultat i një bashkëpunimi të suksesshëm në mes të SCAAK-së dhe Zyrës Kombëtare të Auditimit (ZKA), të gjithë zyrtarët e këtij institucioni kanë ndjekur dhe përfunduar çertifikimin në përputhje me Standardet Ndërkombëtare të Institucioneve Supreme të Auditimit (ISSAI). Për më shumë informacione rreth SCAAK, programeve çertifikuese, anëtarësimit dhe shërbimeve profesionale, vizitoni faqen zyrtare: www.scaak.org